لو حد اتحرش بيكى !!

موضوع مشغول بيه من زمان يمكن لأن مفيش حد فى مصر مسمعش عنه ويمكن لان ناس كتير اوى اتعرضوله بانواعه المختلفه ومش مهم احكى واتفلسف عن انواعه والسن وازاى وكل الرغى اللى شبعنا منه ده

عايز اكتب ازاى اتعامل لو انا بنت مع حد بيتحرش بيا واية الحدود بتاعتى واية اللى مينفعش اعمله ؟

طبعا البنات هايقولك انت مش عارف وبعدين انت عمرك ماهتكون زينا لانى سمعت كتير من الكلام ده انا فعلا مش هاكون زيكم بس انا بحاول احط نفسى مكان بنت وكمان بفكر بالفكر اللى انتى هاتتعاملى معاه فى موقف التحرش .

فى الأول والاخر لازم تكونى محددة موقفك وعارفه هاتعملى اية لما تتعرضى للتحرش من قبل ما يحصل لان التفكير ساعة الموقف بيكون صعب وغالبا بيكون غلط لازم تكونى محددة هاتتعاملى ازاى واية اقصى حاجة واية اللى عمرك ماهاتتنازلى عنه ولازم تكونى عارفة اية اكتر فئة هى اللى بتواجهى منها التحرش عشان دى اللى تركزى هاتعملى اية معاها وتكونى محددة الكلام والفعل ومتوقعة رد الفعل .

-- اولا لو المتحرش طفل وده كتير الايام دى , فى رأيي ده سهل شوية لأن انتى حجمك اكبر منه وغالبا الشارع لو خد باله هايكون معاكى واخر حاجة هايعملوها هايقولو ماتعمليش عقلك بعقله ده صغير لكن مش هاتلاقى حد يضربك مثلا او يزعق جامد

لازم تتعاملى بحكمة وذكاء يعنى هو لو اتحرش لفظيا ممكن تسيبيه وممكن لأ حسب حالتك النفسية ساعتها وحسب منظر الطفل والجو العام فى الشارع

اما لو جسديا رأيي انك لازم تتعاملى معاه تضربيه هو بيكون خايف لانه مش متوقع رد الفعل ده كمان لانه عارف ان اللى بيعمله غلط

ماتسبيهوش لان ده لما يكبر هايكون المتحرش اللى صعب تتعاملى معاه لانه وهو طفل خد خبرة ومبقاش خايف ومتخيل ان ده حقه وان ده بيثبت رجولته فلازم يكون الرد حازم جدا وقوى

لو "لمس او عمل حاجة " وجرى وينفع تجيبيه لازم تجيبيه واعرف كتير عملوا كده ونجحوا . لو جرى وملحقتيهوش ياريت تفتكرى شكله عشان لو مشيتى فى المكان تانى وشفتيه راقبى سلوكه واستعدى انك تجيبيه المرادى .

--ثانيا لو المتحرش شاب هنا لازم ذكاء وسرعة بديهة لان حسب الشارع والمكان واللى انتى لابساه -"هما اغبيا معلش " - هايكون رد الفعل

 لو فى اتوبيس او ميكروباص لازم تتكلمى وتعلى صوتك وتبهدليه براحتك ولو فى ستات موجودين يبقى كويس هنا خدى راحتك ع الاخر وديما وانتى بتعلى صوتك وجهى الكلام للى قاعدين فى المواصله من الستات " ينفع كده ياحجة ينفع كده ياست ...."

لو فى الشارع ده اصعب موقف اعتقد لكن الموقف يكون سهل لو مقررة وعارفة كويس هاتعملى اية من الاول

فى مرات لازم متعمليش حاجة ده لو الشاب صايع ومنظره بتاع شارع هنا اى تعامل غالبا هايكون انتى اللى غلط وهايقل منك

لو منظره عادى وفى مكان عام ومد ايده وهو لوحده يبقى ممكن تضربيه بعد مايمشى باى حاجة موجودة فى الشارع ويفضل يكون طوبة ولو اتدير وعايز يضرب على صوتك وبرضو لمى الناس بحيث انك توجهى الكلام ليهم

لو الشاب معاه كذا واحد هنا حسب شخصيتك انتى لو عايزة ماتتنازليش عن حقك وشجاعة يبقى لازم يكون صوتك عالى ومتتهزيش ثانية وطالما قررتى تتعاملى لازم ماتتراجعيش " لو قولتى ماتخافيش ولو خفتى ماتقوليش "

لو على موتوسيكل اضربى بطوبة لو تعرفى

-- لو راجل كبير هزأى براحتك وفرجى عليه الناس بكلام انتى محضراه من قبل ما الموقف يحصل وفاكراه كويس

-- لو بنت هى اللى بتتحرش بولد ده بيبقى صعب اوى ولكن كل واحد وتربيته بقى